神（ 8 ）
教會，除咗係一班人聚首一堂敬拜神嘅地方之外，仲係一個社群；呢個社群聚集咗一群有同一信仰、同一語言嘅人。喺人口綢密嘅城市，例如香港、首爾等等，同一地區可能有幾個咁樣嘅社群，大家可以自由選擇。
只不過，喺德國我居住嘅地區，人口密度只係每平方公里 140 人，教會社群嘅選擇就少之又少 — 特別係英文教會社群。係 Regensburg 到 Nürnberg 呢 110 公里直徑範圍，內數得出嘅英文教會就只有三間，其中一間喺禁區入面（ NATO 基地 ）；其餘兩間，一間係我完全唔想接觸嘅靈恩派教會 — 我唔想禁食祈禱十幾個鐘直到自己 「 說方言 」；我覺得我講嘅方言一定係粗口……
於是，唯一嘅選擇，就係 Paul 嘅獨立浸會 — 專為駐紮喺 NATO 基地美軍而設嘅教會。
於是，我喺德國嘅頭六年日子，就同呢班只係僅次極右嘅 「 軍人、基右、共和黨 」 無敵組合喺同一屋簷下祈禱……
上星期講到 Robbie 嘅搬龍門絕技，我漏咗一件事冇講 — 呢件係佢搬龍門歷史中嘅經典，完全係 「 公就我贏、字就你輸 」 嘅教會版。
話說某次 Bible study，讀經時提及到 《 馬太福音 》 7:7 「 你們祈求，就給你們；尋找，就尋見；叩門，就給你們開門。 」 我相信只要返過三次以上教會，都會聽牧者或者教友提及過呢節經文 — 新約 「 四福音 」 係現代教會收𡃁必備法寶；要𡁻人批判人就 「 保羅書信 」 — 完全係高／連登仔揀女揀老婆或者仇女批判嘅道德標準。
馬太福音呢節經文其實係個雷區，因為無論你係咪教徒，只要有祈過禱都知咩事。咁多年我聽過最有 「 智慧 」 嘅解釋係 「 No 都係個答案 」 — 會嗌回水但你吹佢唔脹。
Robbie 就唔同喇，佢喺所有人面前拋出一句： 「 經文百分百準確，你哋試過求唔到係祈錯禱。 」 我哋當然所有人靜晒、等候佢過料點樣祈啱禱。
請移玉步往 Patreon 繼續閱讀；感謝！
歡迎大家加入我嘅《IF 文章 PUSH》channel：https://t.me/ifpush、同埋 subscribe 我嘅 stories，咁樣大家就可以以最快嘅速度、獲得我嘅文章更新推送；感謝大家嘅支持。大家亦可以喺 Patreon follow 返我： https://www.patreon.com/herrfung
