承上文，大約個多鐘後。
彌生包咗架直升機嚟接我。其實來往米蘭同 Lake Como 之間一直都有定期直升機航班，但呢架唔係嗰啲直升機，因為航程嘅終點唔係米蘭直升機場。彌生包咗佢直飛醫院……
我一直都知道呢個女人有錢，但我從來冇諗過喺呢個前題下、佢仍然可以一次又一次 surprise 我。
喺機上，彌生差唔多每五分鐘問我一次 「 你見點呀 」 ，坦白講其實有啲煩、但又嬲佢唔落 — 佢真係好錫我。
半個鐘後，直升機降落米蘭 Ospedale Niguarda Ca’ Granda 醫院。喺停機坪，兩個護士同一個著西裝、貌似醫生嘅男人等待直升機降落。直升機停定後，三人組推住輪椅快步行近。
「 木下小姐，歡迎光臨！ 」 為首嘅男人同彌生握手打招呼。
「 Dr. Mancini，麻煩晒你； 」 彌生握手後向佢介紹我。「 我朋友 Alan 啱啱喺 Lake Como 中暑暈咗，跌過落哋；麻煩你幫佢檢查吓。 」
「 冇問題， 」 Dr. Mancini 好專業咁答佢。「 你 call 我嗰陣已經預備好晒。Alan，麻煩你跟我哋嚟。 」 於是，我俾兩個護士推住入醫院。
呢間 Ospedale Niguarda Ca’ Granda 醫院地方好大，護士差唔多推咗五分鐘先進入室內。稍為辦理入院手續後，護士推咗我上一間私人病房、擺低病人衫後就暫時離開。
「 其實檢查吓啫，唔使住院啦…… 」 我當然唔鍾意瞓醫院。「 不如 check 完返屋企啦…… 」
「 你乖豬啦…… 」 彌生突然變咗個我未見過嘅樣 — 媽咪。「 頭先你暈過、又跌過落地，穩陣啲、等醫生觀察一晚先走啦，好唔好？ 」
「 知道，媽咪…… 」 拗佢唔過唯有扮 cute。
「 媽咪定 Mimi 呀？ 」 佢哄住我笑。「 中暑燒壞腦呀你？ 」 因為醫院唔方便依邑，我哋相視而笑。
睇嚟我同外國醫院緣份未盡……
十五分鐘後，護士 「 提取 」 咗我去檢查。首先一個醫生檢查我全身有冇外傷骨折之類，再抽血留小便化驗，然後照咗肋骨同盤骨嘅 X 光；最後我再俾人送咗去做頭部 CT scan。嚴格嚟講，我做咗次啲有錢佬每年喺香港或者出埠 「 醫療旅行 」 嘅檢查。
俾人玩馬騮咁玩完一輪後，護士終於推我返房。除咗彌生，Ciara 同 Gabi 都嚟咗 — 佢哋唔知邊個去咗買 pizza 返嚟食緊……
請移玉步往 Patreon 繼續閱讀；感謝！
《 強人 》 係羅文喺 1978 年推出第四張同名個人專輯嘅主打歌曲，煇黃作品。《 強人 》 同時亦係 TVB 同名電視劇主題曲。
黃霑曾經喺佢嘅博士論文 《 粵語流行曲的發展與興衰：香港流行音樂研究 1949－1997 》 中提及呢隻歌 「 全曲渾成一體，有如長江大河，滔滔奔流到海，衝進無涯。 」 《 強人 》一曲顧嘉煇以簡單嘅 AB 格式寫成，秉承香港廣東歌一向簡單編曲風格。黃霑嘅詞一向帶啲出世、超脫風格， 《 強人 》 寫嘅並唔係一個強者嘅即時領悟；要到達呢種境界，即使強者都可能要幾十年修為。
電視劇播出嗰陣我仲好細，完全唔知套劇講乜；但呢首歌一定唱過，雖然亦未必知道啲詞噏乜。七八十年代 TVB 劇雖然一貫粗製濫造，但威力仍然沒法擋。
是與非 如何分對錯
恨與哀 誰人解因果
敵友之間紛爭 難為彼我
恨愛可有界線 同是分不清楚
看世間 成敗轉眼就過
弱者 強人都犧牲多
莫記此中得失 不記恨愛相纏
只記共你當年 曾經相識過
歡迎大家加入我嘅《IF 文章 PUSH》channel：https://t.me/ifpush、同埋 subscribe 我嘅 stories，咁樣大家就可以以最快嘅速度、獲得我嘅文章更新推送；感謝大家嘅支持。大家亦可以喺 Patreon follow 返我： https://www.patreon.com/herrfung
