Member-only story
你話，如果人生冇咗酒呢樣嘢的話，我哋點樣生存落去？
大家有冇諗過，冇咗酒的話，我哋嘅自殺率會高咗幾多？酒係最方便嘅解愁捷徑，一個好唔開心、好失落嘅人，你寧願佢攞住支酒借酒消愁、定係攞住杯砒霜？
咁當然，你要駁我話啲人飲大兩杯先嚟自殺又點計，咁我答你唔到。只不過，以個 norm 嚟計，飲大兩杯、第二日酒醒又一條好漢嘅比率，一定比飲大兩杯上天台跳樓嘅高好多；我哋無謂用極端嘅例子嚟斟酌。
人係懦弱而冇乜意志嘅動物，心靈又脆弱，非常需要好似酒呢啲「逃避現實品」嚟補完。就算上癮，上酒癮嘅代價都係最輕嘅 — 上毒癮傷身兼壞腎，上賭癮輸你成副身家；上酒癮傷身又唔會即死、俾你喪隊 Chivas Regal The Icon 或者 82 Chateau Lafite，你隊到幾多支？（你個荷包又隊到幾多支？）
乜都唔好講，起碼，我同手上支酒之間，唔會有第三者出現。
翌日早上。
我擘開眼，見到周圍都係墳墓，唔通我死咗？
宿醉嘅頭痛鏗鏘有力咁話我聽：你就想喇！仲有排你捱呀！
咁……我喺邊度？
我回頭一望我靠住嚟瞓嘅墓碑，係 Noel 嘅墓碑，我又再次喺佢墳前飲醉酒瞓著咗。以前古代好興嗰啲喺墳前搭間屋守孝三年嘅習俗，其實都唔係一件壞事，起碼就算我飲大咗，都仲躝到返去瞓，唔使俾舊冷冰冰嘅碑石整到腰骨痛……
五分鐘後，我開始記得之前發生咗咩事，我疑似戴咗頂虛擬嘅綠帽。頂帽之所以係「虛擬」，係因為我連 Heather 係圓係扁都未見過，只係傾偈同睇相；但亦都只係傾偈同睇相，佢已經急不及待咁派帽俾我，呢個女人如果真係同佢一齊的話，真係帽店都有得我開。我覺得好似 WhatsApp 呢啲 IM 應該喺用戶 add 新 friend 嘅時候彈個警告出嚟：「網戀危害健康！」
我望一望手表，琴日嘅同一時間，我同 Heather 先啱啱開始。由開始到有外遇到分手，真係廿四小時唔使；香港人果然秒秒鐘幾廿萬上落。
原來，得同失之間嘅距離，可以如此近；今日總算見識過。
我稍為整理一下 Noel 個墓地之後，再輕輕同佢講多一句「對唔住」，然後我就離開。上咗車之後，我一時間唔知自己應該去邊。我唔想返屋企，但又唔知有咩地方好去……
一邊揸車我一邊諗，自從 Noel 過身後，我對住佢講「對唔住」嘅次數，可能係我同佢一齊十年嘅總和。以前聽阿媽教訓家姐、叫佢管好個老公、話「你一行轉背啲男人就會作怪」，原來就係咁嘅一回事……
