Member-only story
我係個喺八十年代長大嘅人，仲記得當時屋企得一個電話，家姐煲緊電話粥、大佬典晒地求佢快啲收線、要等女朋友電話嘅情境。當時，好多人為咗等個電話，連街都唔敢出。
到九十年代，好多人開始有手提電話。嗰個年代電話係要嚟傾、唔係要嚟碌嘅。雖然等電話已經唔再局限喺屋企，但當知道有人會搵你嗰陣，大家都仲會搵個好收啲嘅地方等吓電話。
畢業後，我去咗韓國做嘢。慢慢 smartphone 開始流行，大家開始咗一路行一路碌手機同仆街嘅日子。Smartphone 嘅流行，造就咗另外一個全新嘅通訊方式：流動版 instant messenger。人類開始失去語言能力，同時開始進化、生出第十一同第十二隻手指，方便篤手機。
Instant messenger 嘅盛行，同時改變咗社交禮儀嘅法則。以前最冇禮貌嘅行為，係 call 極都唔覆機，「唔覆機出部 call 機嚟做乜？」而家，最廣泛而冇禮貌嘅行為，叫「已讀不回」。你永遠唔會知對方係小緊便唔得閒覆、定係諗住下一世先覆。
賀太初，你究竟係腎虧小便小足大半日，定係諗住下一世先覆我 message？
I am not good at waiting.
I am not good at waiting.
I am not good at waiting.
講三次唔係因為好重要，係因為我等到好無聊。
連續幾個鐘，Heather 都唔見人，就連已讀不回嗰個藍剔都冇；即係話，佢連睇我 message 都嫌費事……
去到呢一刻，Heather 褪軚、我再次俾女飛呢一點，幾乎已經係肯定嘅事實 — 喺電訊網絡發達到接近氾濫嘅香港，究竟要搵個咩地方先可以幾個鐘都收唔到 message？就算佢入咗隔離營都收到啦！
褪軚唔緊要、落咗柯打先發現買錯貨都唔緊要，撻訂你都起碼出句聲囉！唔係真係幼稚到認為唔搵唔覆唔理就當冇發生過呀？！卅四歲人喺任何國家都喺成年人囉！可唔可以唔好咁小學雞？！唔通呢排香港成日黑雨、所以佢個腦入咗水？
你係咪後悔？想改變主意？
我忍唔住，終於將公仔嘅腸連其他內臟都畫埋出嚟。我都係要求你喺了結一段關係嗰陣開句聲啫，咁做唔算好唔 gentleman 吖！
終於，喺冇限嘅胡思亂想同埋唔知過咗幾耐之後，我見到 Heather 個名下面多咗 online 呢個字，然後我留俾佢嘅 message 轉晒藍剔。佢終於捨得蒲頭喇！
