搵食啫…… Really?!
我曾經喺之前嘅文章或者小說寫過， 「 事業 」 係玩弄人類嘅傑作；講到尾其實就係 「 搵食 」 — 搵三餐溫飽咁解。大家喺 NatGeo 睇啲野生動物點搵食？30 至 50 秒 150% VO2 Max 嘅捕殺，然後大快朵頤；食飽後喺啲殘羹附近瞓個回籠覺，就係咁多。隻動物唔會諗： 「 不如留返舊肉夜啲宵夜 」 、 「 阿仔去馬達加斯加遊學要幾舊肉落訂 」 ，或者 「 鹿肉兌 Bitcoin 呢期升緊，買返啲搏刀仔鋸大樹 」 之類。
所有嘢都係我哋呢班自詡 「 萬物之靈 」 嘅靈長目動物自己諗出嚟玩死自己嘅傑作。喺我哋嘅傳繹， 「 搵食 」 包括供樓、供車、退休金、旅遊基金、子女教育基金、四十萬國際學校零息債券、粉紅色 Chanel 2.55、Thom Browne 24SS 紅白藍臂章 blazer、米芝蓮三星餐廳攞住杯紅酒打卡等等。加咗呢堆 wishlist 真係做鬼都唔靈。
我唔係突然覺今是而昨非、要 criticize 呢套搵食行為；更加唔係反樸歸真、披上袈裟勸大家回頭是岸 — 唔好傻，一來回頭只會兩頭唔到岸，二來我仲買緊隻 Patek Philippe Nautilus。
作為個職場老屎忽，我只係想拋磚引肉、講少少職場故事然後搲水吹；僅此而已。
大家喺畢業後、開始人生第一份全職工作時，有冇聽過類同說話：
「 好好哋返工，唔好遲到早退，唔好怕蝕底，唔好怕做衰仔，肯捱肯搏，平時有禮貌啲，唔好一開聲叫人個名，叫聲阿哥阿姐，禮多人不怪，要謙虛啲，唔好心急，唔好搏表現，要穩打穩紮，老細見到自然會睇得起你！ 」
唔會完全相同，但或多或少都應該有聽過類似說話。我 quote 嘅都唔係我老豆老母同我講 — 佢哋仲未夠膽死咁無知。講嘅係我表叔，喺我準備做記者之前某次晚飯同我講。
唔好遲到早退我冇意見，唔好怕蝕底、唔好怕做衰仔、肯捱肯搏嘅後果就係做牛或者奴隸獸；哥前哥後三分險，我相信冇乜有腦嘅同事鍾意你哥佢，因為同畫個標靶喺佢背脊冇分別；唔好搏表現，要穩打穩紮…… 我表叔喺我幼稚園嗰陣進入某紡織廠做管工，到我入西周做財記嗰陣仍然係管工，只係廠搬咗上大陸。
我唔否定佢對我提醒嘅好心，不過好心做壞事亦非鮮有。
請移玉步往 Patreon 繼續閱讀；感謝！
歡迎大家加入我嘅《IF 文章 PUSH》channel：https://t.me/ifpush、同埋 subscribe 我嘅 stories，咁樣大家就可以以最快嘅速度、獲得我嘅文章更新推送；感謝大家嘅支持。大家亦可以喺 Patreon follow 返我： https://www.patreon.com/herrfung
