其實，所有都係你主觀意願而已。Chloe本身性格並冇咁委屈，否則佢一早已經俾佢老豆迫出禍，等唔到我嘅出現。好多時有事發生，佢會唔開心一陣，但好快就會搵到方法放低move on。我睇咗咁多年，我明白佢心理上嘅運作。

話說我個韓國朋友（成日提嗰個）每晚臨瞓前，都要搵啲傷感文字嚟睇（有時候用 papago 睇我啲舊作），睇到喊得出就會乖乖去瞓；佢話喊完後瞓得特別舒服。你覺得佢黐筋、攞心嚟碎咩？佢係韓國最成功嘅藝人之一，雖然每個人都有唔同嘅生活煩惱，但點講佢都唔係最慘嗰班被壓迫者。有啲嘢，可能係民族性、可能係個人性格；唯一肯定嘅，就係個體以外嘅人唔可能完全明白，懶理你係咪有相同經歷。正如喺德國或者其他歐洲國家，好多人都唔明，點解香港人唔企硬反抗？但，香港人真係冇反抗咩？當然有，但呢樣嘢只有你哋先會明，外人就只會覺得你哋做得唔夠。

慘情點嚟？趕走日本人，然後就韓戰；戰後諗住有好日子過，點知一個接一個嘅獨裁者，每次反抗都死一千幾百人（仲係年輕人、大學生），死足幾十年。到最後，真係有民主，但個社會就變得功利不堪、靠欺壓貧民去巧取豪奪；然後同你講：國家要發展，你要犧牲小我、你要放棄生活、放棄婚姻、放棄一切去為你老闆創造財富，否則你就會喺四十幾歲被迫「退休」，亦唔再會有人請你，你如果有仔女未婚的話，佢哋會驚未來襯家會因為你失業而推翻婚事、覺得你陀衰家……

咁你話我聽，點解會悲情？