PR行業就係咁運作，客戶覺得你係1-tier media、佢哋想approach你，我哋就要厚住面皮去搵你哋。我嘅強項係media management，係因為我係記者出身，我可以度一個你哋唔可以拒絕（或者講係配合你哋嘅編採路線）嘅story angle去pitch你哋，所以成功機會高。但唔係個個PR都識呢樣嘢，有好多U grad後直接入行做PR嘅人，未必識得咁樣轉angle諗嘢，所以會炒車。但佢唔可以因為怕俾記者鬧就拒絕客戶嘅要求，因為PR pitch記者係天職。

掉卡片呢啲一時嘅情緒發洩，我都仲可以頂得到。最怕有啲記者（包括當年嘅我），會直接將呢啲「誤會」寫出嚟。喺《北角》嘅歲月，就曾經有西報記者，因為收到我哋啲小妹妹錯發嘅中文press release，而直接喺報紙寫咗呢件事出嚟！你可以想像，我哋個客睇到會點。