Member-only story
維也納某住宅內，一人一貓正在對峙。
人：「做乜啤住我呀？你覺唔覺得自己好冇禮貌？」
貓（凌厲眼神溝通中，下同）：「鍾意啤你咪啤你囉！而我不知道咩叫禮貌。冇事啓奏就跪安吧！」
人：「做乜唔食嘢呀？想練仙呀？」
貓：「都唔係媽媽餵開嘅三才吞拿魚，唔食！同埋，你真係有心餵朕，至少都添返滿個碟吖！得嗰八成滿朕點食呀？！」
人：「封咗城啲寵物用品店唔送貨，你食住 Whiskas 先唔得嘅咩？街邊啲浪浪連食都冇得食呀！你仲咁揀飲擇食！」
貓：「你今日第一日做奴才呀？！就算啲嘢好好食，朕都唔會食多過三啖！街邊浪浪冇得食，呢啲好不幸吖！不過朕唔會冇得食喎！你捨得唔俾我食咩？！所以話之你封城定封國，你俾唔啱朕就罷食！跪安吧！」
「真係咁難食咩？！」我拎起碟 Whiskas，用手指了撩少少入口。「唔係呀，色香味俱全喎！乖啦！快啲食啦！」
貓（放棄、掉頭走）：「你咁鍾意食，朕成碟賜晒俾你！可唔可以幫朕搵過個醒目少少又冇咁無聊嘅奴才呀？！」
午飯後。
由於 Graham 佢哋屋企同我只有三分鐘腳程之遙，呢段時期每逢午後，我都會去佢哋屋企、幫佢哋執吓屋、打理吓家頭細務，然後順便黐埋餐先走。
寡佬嘅嘢，有時候其實同浪浪真係冇乜分別。
「Grüß Gott, mein Liebe Putzmann!」我入屋後，後院傳嚟 Beatrice嘅聲音。「Wie geht’s? 我嘅御用賓賓過嚟開工嗱？！」
「Habedere Frau B！唔使返酒店咩？」我問佢。「你件 Mann 呢？」
「過嚟坐吓先啦！前世未做夠咩你！」佢叫住準備入廚房嘅我。「我今日 WFH 呀，佢就要戇 duty，今晚得我同你食咋。」我點頭，然後去沖咗兩杯 Wiener Melange，同 Beatrice 一齊享受一下維也納春夏交替時份嘅午後陽光。
「我哋幾耐冇試過咁悠閒咁坐喺花園晒太陽飲咖啡呢？」佢問我。
