感謝你用心去閱讀，更感謝你有呢份智慧去閱讀。我一直擔心，係幾百篇小說嘅創作完成後，連一個能夠完全解讀字裏行間隱藏意思嘅讀者都冇，好彩有你嘅出現。呢篇後感同埋極少數同我有互動嘅讀者，係我繼續寫落去、不至爛尾嘅動力。

其實，《中環》從來都唔勵志，亦唔係純粹嘅職場故事。呢個係個遲來嘅覺悟，俾我喺出現冇彎轉嘅事情之前一個抽身嘅機會。如果當日我仍然執迷，咁往後嘅日子亦只會要靠一啲越嚟越踩界嘅工作去維生；如果良知未泯，數年後我仍然要選擇離開。業力大流並唔係我哋可以對抗嘅嘢，人可以選擇唔同嘅路，但終點有時只得一個。

業係好有趣嘅嘢，我都曾經諗過，如果我當日冇去韓國，會唔會所有嘢都唔同晒？答案其實並非絕對。形象化去講，我仍然可能喺某個時間、某個空間認識到Chloe，然後事情繼續發生，最後都係同Winnie離開香港。過程唔同，但結果可能一樣，因為我哋逃唔出嘅，係業。

至於點解走得咁急，呢個其實係多年嚟嘅領悟 - 如果我好似其他人咁、乜都講「穩陣」、最好搵多兩年錢喺外國買定屋搵定工安頓好晒先走的話，我大概唔會走得到。慾望係無止境嘅，有時要成就一件事，所需嘅只不過係快刀斬亂蔴。講到尾，我唔相信我離開香港後會搵唔到食。

多謝你花時間去刨我啲廢文，期待你嘅下集。