可能其實係我冇留意，所以而家先知，係我遲鈍。如果你哋已經知嘅，當冇睇過呢篇嘢啦！
是咁的，我不時都會留意吓，自己啲文有幾多claps。講真，寫咁多嘢，又唔係賣錢，無非都係想多啲claps滿足一吓，俾啲成就感自己啫。
今朝起身，循例上嚟爬文。睇完文派完claps，睇吓自己啲claps數，突然發現，我每篇文唔見咗十幾二十個claps。唔係一篇半篇，係十幾廿篇，甚至廿幾卅篇；公海文係咁，members only嘅都係咁。
我覺得奇怪，於是寫個email去Medium嘅CS問個明白。老老豆豆，有啲文我有錢收㗎！無啦啦條數細咗，問吓都唔為過吖！
幾個鐘後，我收到Medium嘅回覆：
咁即係點？我有follower朋友個account停咗，於是過往佢俾我嘅claps就全部唔計數？我唔係好明呢個機制嘅背後原因喎。
佢個email用詞係suspended，咁如果嗰位朋友係自己deactivate個account又點呢？如果deactivate都係咁的話，萬一啲大戶好似史兄（唔想亂tag你，你自己蒲頭啦）呢類，有一日唔玩deactivate account的話，咁我咪嘔claps嘔到仆街？
先唔去討論，我嗰位被停權嘅朋友，因乜被停權（可能自己停，可能俾人停，我真係唔知），我每篇文唔見十幾廿個claps（呢位係好捧場嘅follower朋友），公海文就話算啫，behind paywall嘅文章，Medium會唔會要我嘔返錢出嚟㗎？
原來呢度興分手收返晒啲禮物㗎？
大家有冇遇過同樣嘅情況？
